TUN TOPOS - SUKO NEGERAI

Stabik magea lenget do nejunjung, stabik magea bumai do tenipok, stabik magea mulo jijai stabik magea pengetuwai sadei.

Detaun bik ayun, debulen bik sipen, demingau bik lalau, debilai bik cigai, dejam bik pejem. Baso keme dapet kabar magea bito nembin malim pedito. Baso bilai yo bilai baik bulen betuweak Rajo bakea sapei moi sadei keme, pesen dik nembin malim pedito nano, neak bilai yo rupone saut ne sapei, kenabul tuhan Rajo sapei niyen neak Kutai keme.

Ngen sapei ne kumu rajo dio keme temimo ngen adat ca’o pesako deno, dio a keme made iben pena’ok akuak madeak, iben penawei akuak mbilang.

Iben ade depicik nik, pinang ade depiok alus, iben depicik nik bi teletok, pinang depiok alus bik sapei, keme lok minget kune magea eleng-eleng, minget kune magea semar-mar, minget magea adat deno, minget kune magea adat ca’o dute. Ite mok salang ngen saling, salang tun kundei dumai belek moi talang, tun kundei talang belek moi sadei, dapet ta’ok magea tawea. Madeak igai kumu Rajo keme, senajak senajai teko moi kutai keme. Dio ade iben pena’ok ngen penawea, tulung kulo kumu temimo iben keme, salang gik kumu Rajo teko kundei ku’uak, teko temlek keme anok kutai sadei yo, memang kumu teko kundei ku’uak, bi tesu’uk tebo duwai telau, bi telake’ak tang a’ai lemo tujuak, bi elakeak kulo gais pigai kutai keme, bi sapei ba kumu neak kutai keme, bi sapei beak nyoa pinang dio ba kumu dapet ta’ok tawea ngen tawe’a.

Dio ade celako ne pemaneu kumu teko moi kutai keme, temau kumu ktai sunyai, latet se’ut, temau kumu umeak pelupuak bele’et tiang se’ik, temau kumu umeak jelebeng bejejer dawen, anok kutai dik calak ne bik alau semendo, tinggea keme dik dudat ne temungau sadei. Amen pengasai keme, kumu rajo moi kutai keme, asai tuweak bumai senu’ung buluak gading, asai tuwaek lenget tenabor uleak bitang, asai tekecep tebau talang, asai tekenem biyoa imbo, asai ne sengok betemau magea kumu Rajo, Rajo calak menghukum adea.

Dio ba do dapet uku semapei, mino maaf amen ta’ok tawea keme sisip, minoi maaf kulo amen pengena keme saleak, keme ma’ep kumu dapet belek moi bugai keme, salam mualaikum warahmatulah hiwabarakatuh…..

Disusun oleh Erwin Basrin/Tun Topos

Asalam mualaikum warah matulah hiwabaratuh, selam mulaikum selam tebung stabik ngen bumai lenget, stabik kulo ngen luweng kelemen, stabik magea mulo jijai, stabik ngen taneak tanai, stabik ngen diwo walai Sembilan, setabil kulo magea diwo pat jemnang kutai, stabik ngen pesireak ulau lureak, stabik ngen kutai sadei yo.

Bilai yo bilai baik bulen tuwaeak, bilai yo kulo kumu kemliak titik duwai yo je besanding madep ite.

Kemipi setawar, setepung diwo kundei lenget selibar paying, tepung diwo serambut panjang, tepung diwo setangai panjang, tepung duwate serambut remas, tepung diwo enam belas talen, tepung diwo matai bilai, teko tempung keduwai udi do betunang, udi do betunang barat spinde kaci, putiak te’us bapatik ati, ijo kuning agai ne nati, mileak meleu ati neak di, oooo anjuk ku alang serto manat, lepok ku agai pegong kedong bilai, lepok ku patik dalen moi baik, unjuk janjai tenegok supeak semayo meket laher batin janjai lok idup sematei, setio mbeak bubeak, betunang mbeak ma’ep buye, betunang mbeak cubo-cubo, gong manat jibeak muker janjai semayo besamo, baik adep, co’a ngen baso, titik nusik, lai nebaso de tuwai kulo nego.

Dio unjuk ku, petuweak serta manat, unjuk ku suluak pemaneu kelmen, unjuk ku senayai pehong kedong bilai, unjuk ku petuweak mbeak saleak lakeak, unjuk manat bagai seriat. Mbeak mupok petik, mbeak melangea patang. Udi ati buliak alau beduwai, alau buliak amen ade kuwat. Neak dasei bakea setuwang, mbeak udi telitas umeak danea, amen udi ade pemaneu, kinoi ba duo mage kuwa’ai, kajok kulo kwat suang beduwai.

Kute ite di sedayo dik raek, jano igai bik tuwai dau nidep ngen pengeliak, kalau mbeak ade kedong bilai, ite tedenong tekeliak ade dik rucuak, mbeak mujo eket ne putus penga’ang, renyeng ne coa sudo su’ang, kalau ade biduk ne kelbau, meak munyau renyeng ne coa sudo su’ang, biduk ne coa nam kelbau detok-detok.

Amen ade neak kedong bilai mupok udi do betunang, telanggea petik tekupok pang saleak su’ang, kagea gacang sado de tuwai, kinoi langia ngen idau japai.

Maaf kute ngen sedayo do rapek, uku pelon penyanyo sado de tuwai, serto semapei pengiget kundei pengetuwai, ngen kepiuak kepiting kesumbar ujung asep royot ujung tilai sindang ujung pakoa, semlang udi jijai anok ubet tuwai, dia ba do dapet uju semapei amen ade lisiak ngen saleak kinno maaf io kul amen ade do telangea kulo uku mindo maaf.

Asalam mualaikum warahmatullah hiwabaratuh..

disusun oleh Erwin Basrin/tun toposa

Ali Bilai coa si gen tun, tapi aktivitas babilai do cet tun neak Topos Kemerjo, ali bilai yo kundei asal kata 'Males' ngen 'bilai', tertib pelaksanaan ne aper serai ngen arisan.
Sejarah ali bilai yo aper setuwai ngen sejarah jang o' dewek, amen temiuk sejarah kundei tun tuwai dio bentuk gotong royong atau kerso samo saling mendukung antaro tun-ngen tun, awei ipe amen ade tun lok bekebun atau nyawak atau jano bae kerjo do benek butuh petulung kundei tun dau tapi si coa merugai tun do temulung kerjo ne mako ne sistem yo sapai bilaiyo gi masiak paneu. contoh ali bilai yo misal ne uku ade kerjo neak kebun atau neak ipe uku usaho kemudian ade tun sepakat temulung uku mako sudo o' uku temulung kulo kedau ke'an atao kedau bilai si temulung uku mako dio ba padeak tun ali bilai.

Menarik ne sistem ali bilai yo coa ba ite nam, ketiko ite coa nam males bilai ite bayar ngen caci, pasti do panan ite mok bilai yo singgug, tep bae ite males bilai yo neak kedong bilai tengen bae tun o ade kerjo atau tengen ite nam. Hitungan-hitungan ali bilai yo ade hitungan bilai seandai ne pas ite mok bilai kemudian tengeak bilai ujen lai tep bae hitungan ne debilai, ijai amen tun males bilai ngen ite tep itung ne debilai, kecuali amen bilai kulo ujen do untung ite da. neak ali bilai yo kulo ite ba temangung areak upan atau pemuk bilai o' termasuk ngupi tapi rokok amen si semanai si dewek mbin, kebiasaan ali bilai neak Topo amen do mok bilai yo semanei mako semanei kulo do males bilai ne begitu kulo sebalikne.tiak bdikar

Kedurai Agung ade ba adat rian cao atau adat kebiasaan di ade neak sadei Topos khususne, secara harfiah kedurai yo tai ne madea keturua magea do alus baik bentuk ne keramat atau arwah, kepercayaan alau yo gi ade neak Topos...

Kepercayaan alau roh yo coa si sirik atau menyirikan tapi ade ba kepercayaan tu'un temu'un, argumen luyen nadeak tun tuwai bahwa selain kundei umat manusio ade kulo makluk gaib dan cao komunikasi makei kedurai.

Pelaksana kedurai agung yo ade ba dukun, amen neak topos cigai si dau dukun do pacok melakukan Kedurai yo saat yo cuma tingea abiak tun 3. Kedurai yo dilaksanakan amen ade bencana Bumai Panes, atau ade wabah penyakit do sapai magea masyarakat, persiapan untuk melaksanakan Kedurai Agung yo kulo harus ba senyam pasang sudo ne. Lemeo langia ade bahan do harus senyap de dau ne pas kedurai agung, begitu kedurai agung yo sudo mako lemeo langia yo nagiak ngen seluruh wargo, lemeo yo biso ne dipercayai sebagai sarana tolak balak.

Amen kejijai ne Bumai Panes, neak Topos biaso ne sudo Kedurai Agung dilaksanakan kulo Ratif Agung atau tahlilan keliling sadei dipimpin oleh imam atao tokoh agama. tiak bdikar

Belayua yo ade ba,uleak tun tetuai mena'o...biaso ne dio amen musim legeu atau pei sudo ketem.
Ca'o beleyua yo ade ba, pertamo nemok dawen kawo de baik ne...biaso ne dawen kawo ne agok pucuk. Nidup opoi ungun ,sudo o nelayua dawen kawo yo nano..moi opoi o. Opoi ne coa si lok lai ige,opoi ne lok sedang..de baik ne putung opoi ungun o..pun lisai,atau pun kiyeu luyen.
Belayua yo lok sabar,kerno an amek mot sapei dawen kawo o nano mesok padek...amen bi angup ules ne dawen kawo o. Baru nelunguk,sudo o nisea makei tangen...nunok ngen bioa,serai ngen menea saten. Bioa kunei dawen kawo nelayua yo nano senaring..sudo o nepek lem caker atau samang, biaso ne tun tetuai mena'o makei samang da, nunok ngen gulo nau atau gulo pasir,tameak padek asai ne. Tun tetuai mena'o samo menem bioa dawen kawo nelayua yo,de awit ne betemo..cemrito asal usul ninik puyang mena'o.

Cuma belayua yo uleak tun mena'o niyen de...uyo cigai tun galok igai da.
Do o ba didik cerito tun tetuai jang mena'o..waupun tun uyo cigai kemrejo uleak o,cuma seharus ne ite namen uleak ninik puyang te mena'o. Mokasiak
Anton-Topos