TUN TOPOS - SUKO NEGERAI

By Erwin Tuntopos

Aceh ngen Topos temuan cerito leluhur do erat neak maso lalu, ade cerito persahabatan ngen ade kulo cerito perang, uyo tentu ne berubeak ketiko jaman bi maju, Bunaya, jolok ne ade ba Bun, si tun aceh asli, tapi uyo kembiak dau kontribusi dan ptulung untuk kemajuan tun Topos.

Tengeak idup ne uyo diapdikan untuk milau kakuat tun topos untuk meket igai ca'o adat, sebenea ne cerito perjalanan ne sapai terlibat dau neak Topos ade ba bermuaro kundei si meratau kundei aceh sapei kulau, trus du begaul ngen tun kulau kemudian temau ngen Erwin salah satu tun topos nah, ketiko temau win yo ba si dau tertarik ngen Topos, uyo si bi resmi ijai tun topos, kereno pertamo si bi naket keluargo lai Win sebagai anok aket ngen kemudia si kulo bi nikeak ngen tun topos uyo si bi ade anok na.

Bolg yo kulo sebenea ne murupakan bentuk dukungan dan kontribusi Bun terhadap tun topos, sementaro kembiak dau do luyen ne kontribusi terhadap kampanye adat topos, menea film tentang ka ga nga, film mulang apei, dll. Semoga neak uan bilai dau Bun-Bun do luyen ne lok temulung ngen ba bagiak lemau untuk kemajuan tun topos.

Gen ku Erwin, uku laher neak sadei Topos, waktau uku laher Topos ati gen listrik, untuk penerangan keme makei lapu minyok tanah (lapu Togok), Indok ku tun Topos Ali amen nerunut kundei silsilah kak indok ku mako sapai Bikau dan Ajai, sementaro Tiak Ku Amen nerunut menurut silsilah mako sapai Rajo Tiak Keteko neak Sekandeu Tabeak Daet, dio dibuktikan kundei cao keme neak Topos melalui Cemucua Biyoa, amen Kak indok ku karena keluargo ne sebagai pemegong ju'ei keluargo si coa pakei cemucua biyoa tetapi tun do dau moi cemucua biyoa moi umea keme, sementari kak tiak ku cemucua biyoa ne moi Sekandeu, neak di leluhur ku ade awei o pesen tiak ku.

Uku sekolah SD ngen SMP neak Topos kebetulan cuma SD dan SMP salah satu bangunan pemeriteak do ade neak pio, setelah tamat SMP uku sekula SMA neak Cu'up, waktau sekulah uku diyem umeak wok ku, kebetulan si ade umeak neak Cu'up, ade pengalaman menarik ketiko neak Cu'up selamo neak Topos keme selalu menguno bahaso jang neak pergaulan babilai, waktau gi babelau uku cet tekembin baso jang amen begaul ngen kuwat ku.

Setelah Tamay SMA uku neluak Tiak ku menutut sekulah neak Padang, neak padang uku cubo mbok Fakultas Teknik Sipil neak salah satu perguruan Tinggi Neak Padang, secaro akademisi uku cio dau prestasi, pada hal uku ade ba harapan tun tuwai ku, waktau uku mulio kuliah, Indonesia mengalami krisis, mako tun tuwai ku kulo agok payeak memenuhi kebutuhan kuliah ku, sehinggo beberapo matai kuliah praktek terpakso uku temingea, nah... waktau o kulo kampus-kampus sibuk ngen agenda reformasi, uku milau aktif neak aktivitas yo, waktau uku kuliah kembiak dau musibah neak keluargoku, Tiak Ku tingang kiyeu waktau upeak tembas kebun tun untuk mbayar uang kuliah ku, wok pnan uku tingea waktau SMA ningea, do kembiak lai ne Sebei (indok Tiak ku) ningea, waktau o tiak ku an semido si sakit sehinggo biaya kuliah ku, biaya kuliah asuak ku terpakso bedan, coa ade gen keluargo ku do lok temulung keme kuliah sehinggo kuliah ku ngen asuak ku terpakso bedan.

Menarik ne ketiko uku kuliah, uku belek moi sadei untuk kindoi caci untuk bayar uang kuliah, keliling uku ngen indok ku mesoa pnan kinyem, tapi coa ade tun do lok melei keme kinyem, sehinggo uku coa nam brakat moi Padang nah, waktau o ba sebei ku meningea, an uku neak sadei akhir ne Susi (uyo si ijai ngenyanku..) demapet uku untuk mbayar uang kuliah ku si jemua kalung pemberian indok ne, nukoi kalung o ba semelamat untuk sementaro agenda kuliah ku.

Akhir ne uku coa tamat kuliah pada hal didik igai, cuma menea kripsi igai, uku belek mesaidei cubo menea lembaga, keme ngen kakuat cubo menea AMARTA waktau o' uku ijai supirne, trus uku cubo bergaul ngen kwat-kwat aktivis neak kulau sehinggo mengantar kan ku mimpin AMA Bengkulu organisasi pergerakan masyarakat neak kulau, uyo uku kerjo neak lembaga gen ne Akar, lembago yo hasil kerjo ngen jerih payeak ku dewek tampa bantuan kundei tun dau o'.

Tekat ku cuma do, supayo berguno bagi keluargo ku, ngen masyarakat ku,,,, sudo kileak ehh, coa uku taen biyoa matai ku ngalua amen minget kesaro idupku..... 

Erwin Basrin

(Tun Topos Cubo Menea Perubahan)

Bismillahirrahmanirrahim

Aagamo islam ade ba agamo lenget penutup agamo-agamo sbelum ne,ite samo-samo bi namen hal o. neak lem agamo islam seluyen mencegah kemusrikan,ade kulo pegong de harus tun islam taat magea aturan-aturan ne. Antaro ne ade ba tun islam harus percayo ade ne tuhan cuma do,do o ba tuhan Allah swt.,.si harus berimen magea tuhan Allah coa gen tuhan seluyen tuhan Allah coa gen penan bekinoi seluyen tuhan Allah,tuhan Allah tegok suang coa serupo ngan mahluk coa makei stekuk coa makei tidua coa makei matei coa makei lupo. Do o ba tuhan temuan alam semesto yo,coa de gen nam melei mudarat ngan manfaat kecuali atas izin ne. dio ba de perlu ijai pegong tun islam kerno,dio ba pokok tauhid neak lem agamo yo. amen bi benea-benea percayo ade ne tuhan Allah,de menguasai kute alam yo..tun islam de benea -bena beriman cigai igai bilnai kemrejo uleak uleak kidek igai,.kerno si yakin moi ipe bae si lalu tuhan Allah pasti kemliak si,coa gen penan sbunyen kunoi pngeliak tuhan. Sihinggo tun beriman coa binai igai temingea peritea ne,trus taat & temingea larangan-larangn Allah swt. amen hal yo bi kuet neak lem atei tun islam,mako alamat sadei kecamatan kebupaten bahkan negara ijai aman makamur ngan sentosa. kareno tun islam amen bi benea -benea yakin ngan hal yo..si selalu taat magea Tuhan Allah swt. si coa butuh pujai kunoi manusio si cuma butuh ridho kunoi allah swt. di o ba pokok pertamo neak lem islam.

Sudo o poko keduai ade ba,bahwa tun islam ade pesuruak dio ba malaikat,malaikat yo pesuruak tuhan de paling taat,coa perneak melawen magea periteak tuhan jano igai durhako. malaikat yo ba ijai hamba ngan pesuruak tuhan untuk matur alam rayo ya. baik matur kehidupan manusia maupun matur de luyen ne, Ngan berimen ne tun islam magseak mlaikat yo,temameak keyakinan ne magea zat Allah de paling agung...kerno atas kuaso allah ba alam yo jijai.
Untuk selanjut ne pokok neak lem islam ade ba berimen magea rasul ngan nebai Allah..dio ba pokok ketelau nek lem islamm,umat islam harus yakin ngan percayo magea rasul ngan nebai tenu'un tuhan Allah swt untuk umat manusio neak bumai yo. Ade dau jumlah nebai de harus tun islam meyakini.. cuma de ade neak lem syriat islam cuma 25 nebai ngan rasul. Percayo magea nebai ngan rasul temameak keyakinan magea Allah swt. kareno kasiak sayang tuhan Allah magea manusia si temu'un tukang melei dalen de benea kunoi tuhan tukang temunyuk dalen de luus kunoi tuhan magea manusia ngan ade ne nebai ngan rasul yo ba manusio namen dio dalen de benea ne..ngan dalen de saleak ne. mako coa ite dapet mbayang amen coa tuhan Allah temuun nebai ngan rasul untuk melei petunyuk untuk manusio mako kunoi mena o sapei uyo manusio idup neak lem keadaan jahiliyah.

Nebai ngan rasul de tenu'un Allah swt yo,ade ba min misi ngan visi melalui wahyu tuhan Allah swt magea rasul ngan nebai ne..do ba sariat neak lem agamo islam melalui lisan nebai ngan rasul Allah swt.
Ade kulo pegong de langsung tenu'un tuhan melalui wahyu ne..dio ba kiteb kiteb samawi ( Tu'un berasal kunoi Allah swt )...tun islam dapet periteak kunoi tuhan allah swt untuk berimen magea kiteb kiteb de tenuun Allah swt magea nebai ngan rasul ne. dio ba termasuk pokok neak lem islam ke pat. berimen magea kiteb-kiteb sucai de tenu'un Allah swt magea malaikat ngan nebai pesuruak Allah swt. Antaro kiteb-kiteb de harus tun islam berimen ade ba kiteb zabur,taurat ,injil ngan al-quran. kute kiteb o berasal kunoi tuhan Allah swt. waaupun uyo kiteb zabur,taurat,ngan injil cigai si asli firman tuhan igai...kerno bi nubeak tun yahudi ngan nasrani...cuma ite harus tep berimen magea kiteb2 o..berasal kunoi tuhan Allah swt bel o ne. sedangkan AL-quran coa perneak manusio mubeak ne..dio ba kiteb teraher kunoi tuhanAllah kiteb de paling sucai ijai petunjuk magea manusia denio ngan akhirat..coa de gen kalimat de salea neak lem al-quran. kiteb penutup kute sariat nebai nebai sebelum nebai muhammad saw ...kesucaian ne selalu jenago Allah dewek. coa bakea manusio dapet mubeak kiteb AL-quran. Dio ba pegong idup te denio ngan akhirat.

Selanjut ne,tun islam wajib percayo ngan berimen magea ade ne bilai kiamat..dia ba biso agamo islam magea agamo de luyen neak lem agamo islam ade ne bilai kiamet paset ade ne..coa de gen ragau gok didik. dio dau tuhan Allah temeang neak lem al-quran ngan kulo tameak igai hadits hadits nebai muhammad saw. sehinggo percayo mageak ade ner bilai kiamat ade ba pokok neak lem islam ke lemo.Sedangkan neak lem agamo luyen coa gen keyakinan yo,kalaupun ade bareak neak lem kristen ortodoks dio coa si ijai keyakinan pokok neak lem agamo ne. Tai ne,agamo seluyen islam coa percayo ade ne bilai kiamat. Bilai kiamat ade ba bilai,bahwa kute alam rayo yo ajua. coa de gen de selamat ne,kute ne ajua cecping. cuma zat maha tungea ba coa bakei matei..dio ba Allah swt. percayo akan ade ne bilai kiamat ya,ijai pokok neak lem agamo islam. Mko keyakinan magea bilai kiamat yo,harus benea-benea ade neak lem atei tun islam.
Neak samping tun islam percayo ngan ade ne bilai kiamat yo..tun islam waib kulo berimen magea ade ne takdir de baik ngan takdir de kidek kunoi Allah swt..kereno kute de terjijai neak alam rayo yo atas izin Allah swt. mako wajib magea tun islam berimen nien magea ade ne takdir baik ngan takdir kidek teko ne kunoi tuhan Allah swt. coa de gen nam melei mudarat ngan manfaat kecuali Allah swt. Kkalu tu islam benea-benea yakin magea tekdir baik ngan tekdir kidek kunoi Allah swt

Seandai ne tun islam benea benea berimen magea ke enum pokok neak lem agamo islam yo. mako insya Allah masyarakat ijai amn & coa de gen terjijai uleak uleak kidek...coa de gen tun menea ulek maksiat igai. Kerno si yakin nien neak lem atei ne,bahwa idup manusio yo coa luput kunoi pngeliak tuhan ALLAH SWT. Mudah-mudahan untuk maso teko umat islam khusus ne neak taneak jang,umum ne seluruh indonesia & sluruh denio ade kesadaran neak lem agamo sehinggo tun jang ijai contoh kunoi sukau sukau de luyen...semoga.

Wallahu 'alam bisswab

Anton (Tun Topos Menea Perubahan Melalui Mimbar)

Tulisan siket yo ade ba sekedar susunan kecek keluea kunoi anok jang de bi sudo meding dan kemliak kenyataan neak lapangan tentang mental masyarakat jang de harus sesamo ite mubeak. tulisan yo coa si untuk melei nasehat coa kulo si untuk mengajea tulisan yo cuma ba sekedar suaro nurani anok jang,dan mukin dau anok jang de luyen perneak meding hal yo. Ayok penulis muloi tulisan yo,penulis minoi maaf magea ninik mamak,wok tamang serto magea kekuat kute ne jano igai magea ketuai kutai taneak jang. Bareak nadeak pepateak amen dung paneu ulau ne lekat mako dau bahayo magea si,awei o ba kiro ne penulis,omor pei debulen jagung pengalaman ati si dau. amen ade salea kecek saleak kadeak saleak micang saleak paneu meak segan segan untuk temaok,kerno ijai sipet tun jang amen saleak wajib temaok.

Sukau jang ade saleak do sukau paling tuai neak sumatera khusus ne bahkan indonesia umum ne,sukau yo bi an temgok perdaban neak taneak jang. Pacok ite madeak peradaban lembah sungai ketahun,kerno pertamo sekilai sukau yo ade,ade ba neak sekitar bio tawen. adat ngang bergagea maso mduro kelam perneak bkemang neak lem sukau jang yo,api grot si pacok idup api cayeak ijai upan tun. sehinggo akhir ne tegok ne adat tiang pat lemo ngan rajo. mako sempurno ba peradaban taneak jang...jano igai masuk ne agamo islam.

Cuma masiak dau mental anok jang de gimasiak coa baik,antaro ne ade ba sipet galok mengusak. kenyataan yo dau ite kemliak neak taneak jang,contoh ne ade pembangunan kunoi pemriteak berupo aliran bio pam,coa ite kemliak an taen ne..paset ade de musak ne. Dau igai contoh-contoh de luyen de samo-samo ite namen. Sudo o..sipet coa baik magea tun jang..ade sipet galok kdep mengedep,dau de lok berasea suang ne. Ite mok contoh ne didik. amen ade antaro anok jang de lok melanyut pendidikan mako dau nien rintangan mageak si,ade de madeak gen uleak semkula anok sapei mabis caci kedau o...dan do o antaro kecek de kidek ne. dau igai kecek de luyen,kecek coa baik de harus tun tuai ne temimo. dan magea anok jang de bi jijai tun galok mdep amen ade anok jang de lok temirau si! bahkan perneak ade kejijai,dio neak sadei topos. Si lok melamar kerjo neak instansi pemriteak minoi tulung magea sepupu ne de bi kerjo neak instansi o,mako kerno semangat ne si kemopoa berkas de bi sudo si semiap dan semereak magea sepupu ne o. selang telau bulen si lok milau tes sesuoi ngan prosedur instansi o,waktau o ba si heran kerno gen ne coa terdaftar dan berkas ne nyep coa tau penan ne. Psi temanye ngan sepupu ne o, nadeak sepupu ne coa si tinget penan pek ne igai,kedong bilai akhir ne namen kenoi si cerito berkas ne o,bi nemem sepupu ne. Cubo didik ite meker,akuak taneak jang lok maju amen gi masiak dau mental bareak yo neak masyarakat te,walaupun coa si kute tun jang bareak yo sipet ne,cuma dau kenyataan ite kemliak perneak terjijai peristiwa awei yo. penulis dewek perneak ijai korban mental tun bareak yo.

Amen gimasiak dau sipet bareak yo neak masyarakat jang,mako sulit mageaki te lok temgok cito cito sosial magea masyarakat jang. cuma mudah-mudahan untuk maso teko sipet bareak yo muloi bkuang,kerno coa ite dapet muker,ngan ite bersatu ite dapet mbangun taneak tanai te.
Penulis mengakui bahwa anok-anok jang dau ade kopetensi,dan pitar-pitar .cuma kerno dau mental bareak yo nano sehinggo anok-anok jang dau de bi putus aso ne. amen neak lapangn anok-anok jang coa aleak besaing ngan sukau-sukau de luyen bahkan pacok mengungguli anok-anok kunoi daerah luyen.

Harapan penulis magea ite kute ne,maro ba ite sadar bahwa ite ade cito-cito sosial magea masyarakat te. Ngan ite sesmo medukung ite pacok maju,maro ba ite temingea sipet kidek atei sipet iri ngan sipet-sipet de tercelo de luyen...maro ba ite maju bersamo,maro ba ite saling dukung dmukung. inya Allah ite pacok mubeak mental masyarakat te ijai mental terbaik,harapan te taneak jang pacok ijai taneak "Baldatun thaibatun warabbun ghafur"....Amiin...

Penulis : Anton Sujarwo
Mahasisiwa Universitas Al-azhar Mesir
Tun Topos