TUN TOPOS - SUKO NEGERAI

Belayua yo ade ba,uleak tun tetuai mena'o...biaso ne dio amen musim legeu atau pei sudo ketem.
Ca'o beleyua yo ade ba, pertamo nemok dawen kawo de baik ne...biaso ne dawen kawo ne agok pucuk. Nidup opoi ungun ,sudo o nelayua dawen kawo yo nano..moi opoi o. Opoi ne coa si lok lai ige,opoi ne lok sedang..de baik ne putung opoi ungun o..pun lisai,atau pun kiyeu luyen.
Belayua yo lok sabar,kerno an amek mot sapei dawen kawo o nano mesok padek...amen bi angup ules ne dawen kawo o. Baru nelunguk,sudo o nisea makei tangen...nunok ngen bioa,serai ngen menea saten. Bioa kunei dawen kawo nelayua yo nano senaring..sudo o nepek lem caker atau samang, biaso ne tun tetuai mena'o makei samang da, nunok ngen gulo nau atau gulo pasir,tameak padek asai ne. Tun tetuai mena'o samo menem bioa dawen kawo nelayua yo,de awit ne betemo..cemrito asal usul ninik puyang mena'o.

Cuma belayua yo uleak tun mena'o niyen de...uyo cigai tun galok igai da.
Do o ba didik cerito tun tetuai jang mena'o..waupun tun uyo cigai kemrejo uleak o,cuma seharus ne ite namen uleak ninik puyang te mena'o. Mokasiak
Anton-Topos

Sialang ade ba jolok pun kiyeu,do o biaso ne sengajo nu'ung untuk penan medau. Kiyeu ne lu'us & penan ne biaso ne neak puak sadei,das bioa tik atau neak puak kebun...kiyeu de dau ne nu'ung masyarakat untuk ijai sialang o ade ba kiyeu semalo lipen,pun matiak dau kulo pun kiyeu de luyen. Amen bi ade medau singeak, bi lebiak telau bulen...biaso ne ade acaro mok mis medau. Amen mena'o acaro mok mis medau yo termasuk lem ritual masyarakat..ayok kemnek sialang,ahli-ahli sialang biaso ne miuk saei bania sialang kileak..amen saei ne tenang,mako acaro mok mis medau yo nelanyut. amen ade saei gemaus,berartai ati waktau ne mok medau malem o..!!

Sesuoi ngen adat tun jang tu'un temuun...ayok kemnek sialang,nasang tun pating kileak. Pating o ade ba buluak senlusua neak pun sialang o..makei pasok buluak kulo,neket ngen bes opot atau ngen balet ceik.
sudo o seniap tun tilai tegalung...untuk temu'un mis medau. Ayok muloi kemnek sialang o,harus ade de menyalang ne kileak,makei saer-saer de tu'un temuun kunei ninik puyang..isai saer ne o,coa lebiak kunei mujai medau,madea guno mis medau magea manusio..sehinggo amen tun bi kemnek sialang o be,medau coa btenget..cuma ade sarat ne,amen medau tingep atau masuk lem awok coa buliak munuak.

Alat pasep medau supayo si temingea mis ne,do o makei sobot niyoa nemem...makei asep o medau langsung tebang..waktau o ba tun smisit saang medau o,nepek lem kaleng sudo o tenu'un makei tilai tegilung.
Cuma lem ritual mok mis medau yo,harus teatei..kerno awei nadeak tun tetuai,waktau mok mis medau iso si manusio bae de hadir ne,semat belkat ngen imeu kulo hadir...amen kuang teatei tun kemnek sialang o pacok talau nukoi ne..pun sialang lekat o pacok ijai temeak kenliak ne,amen sapei awei o biaso ne awit bahayo. Sudo o igai,ayok belek kunei mok mis medau..harus teningea mis medau ngen anok ne didik neak bania sialang o.

Do o ba sekelumit ritual adat tun jang & sopan santun masyarakat jang magea mahluk tuhan & alam semesta..Mokasiak.

Anton-Topos