TUN TOPOS - SUKO NEGERAI

Tulisan siket yo ade ba sekedar susunan kecek keluea kunoi anok jang de bi sudo meding dan kemliak kenyataan neak lapangan tentang mental masyarakat jang de harus sesamo ite mubeak. tulisan yo coa si untuk melei nasehat coa kulo si untuk mengajea tulisan yo cuma ba sekedar suaro nurani anok jang,dan mukin dau anok jang de luyen perneak meding hal yo. Ayok penulis muloi tulisan yo,penulis minoi maaf magea ninik mamak,wok tamang serto magea kekuat kute ne jano igai magea ketuai kutai taneak jang. Bareak nadeak pepateak amen dung paneu ulau ne lekat mako dau bahayo magea si,awei o ba kiro ne penulis,omor pei debulen jagung pengalaman ati si dau. amen ade salea kecek saleak kadeak saleak micang saleak paneu meak segan segan untuk temaok,kerno ijai sipet tun jang amen saleak wajib temaok.

Sukau jang ade saleak do sukau paling tuai neak sumatera khusus ne bahkan indonesia umum ne,sukau yo bi an temgok perdaban neak taneak jang. Pacok ite madeak peradaban lembah sungai ketahun,kerno pertamo sekilai sukau yo ade,ade ba neak sekitar bio tawen. adat ngang bergagea maso mduro kelam perneak bkemang neak lem sukau jang yo,api grot si pacok idup api cayeak ijai upan tun. sehinggo akhir ne tegok ne adat tiang pat lemo ngan rajo. mako sempurno ba peradaban taneak jang...jano igai masuk ne agamo islam.

Cuma masiak dau mental anok jang de gimasiak coa baik,antaro ne ade ba sipet galok mengusak. kenyataan yo dau ite kemliak neak taneak jang,contoh ne ade pembangunan kunoi pemriteak berupo aliran bio pam,coa ite kemliak an taen ne..paset ade de musak ne. Dau igai contoh-contoh de luyen de samo-samo ite namen. Sudo o..sipet coa baik magea tun jang..ade sipet galok kdep mengedep,dau de lok berasea suang ne. Ite mok contoh ne didik. amen ade antaro anok jang de lok melanyut pendidikan mako dau nien rintangan mageak si,ade de madeak gen uleak semkula anok sapei mabis caci kedau o...dan do o antaro kecek de kidek ne. dau igai kecek de luyen,kecek coa baik de harus tun tuai ne temimo. dan magea anok jang de bi jijai tun galok mdep amen ade anok jang de lok temirau si! bahkan perneak ade kejijai,dio neak sadei topos. Si lok melamar kerjo neak instansi pemriteak minoi tulung magea sepupu ne de bi kerjo neak instansi o,mako kerno semangat ne si kemopoa berkas de bi sudo si semiap dan semereak magea sepupu ne o. selang telau bulen si lok milau tes sesuoi ngan prosedur instansi o,waktau o ba si heran kerno gen ne coa terdaftar dan berkas ne nyep coa tau penan ne. Psi temanye ngan sepupu ne o, nadeak sepupu ne coa si tinget penan pek ne igai,kedong bilai akhir ne namen kenoi si cerito berkas ne o,bi nemem sepupu ne. Cubo didik ite meker,akuak taneak jang lok maju amen gi masiak dau mental bareak yo neak masyarakat te,walaupun coa si kute tun jang bareak yo sipet ne,cuma dau kenyataan ite kemliak perneak terjijai peristiwa awei yo. penulis dewek perneak ijai korban mental tun bareak yo.

Amen gimasiak dau sipet bareak yo neak masyarakat jang,mako sulit mageaki te lok temgok cito cito sosial magea masyarakat jang. cuma mudah-mudahan untuk maso teko sipet bareak yo muloi bkuang,kerno coa ite dapet muker,ngan ite bersatu ite dapet mbangun taneak tanai te.
Penulis mengakui bahwa anok-anok jang dau ade kopetensi,dan pitar-pitar .cuma kerno dau mental bareak yo nano sehinggo anok-anok jang dau de bi putus aso ne. amen neak lapangn anok-anok jang coa aleak besaing ngan sukau-sukau de luyen bahkan pacok mengungguli anok-anok kunoi daerah luyen.

Harapan penulis magea ite kute ne,maro ba ite sadar bahwa ite ade cito-cito sosial magea masyarakat te. Ngan ite sesmo medukung ite pacok maju,maro ba ite temingea sipet kidek atei sipet iri ngan sipet-sipet de tercelo de luyen...maro ba ite maju bersamo,maro ba ite saling dukung dmukung. inya Allah ite pacok mubeak mental masyarakat te ijai mental terbaik,harapan te taneak jang pacok ijai taneak "Baldatun thaibatun warabbun ghafur"....Amiin...

Penulis : Anton Sujarwo
Mahasisiwa Universitas Al-azhar Mesir
Tun Topos

Neak puweng bilai ade anok lenei jemua, tibo-tibo teko anok uso bejuget, coa sengajo si tepelat anok lenei peuk jemua, anok lenei yo kemudian matei, kemlian anok ne matei lenei yo kemudian madau magea pengadilan hakim ne kacea.

Sodo ngadau o, mulai ba kacea nyelidik ngen medeu anok uso moi pengadilan kacea,

INTROGASI pun Muloi

Kacea; "anok uso, benea ko melat anok lenei sapei matei.?"

Anok Usu; "benea pak Hakim, tapi uku coa sengajo, ano uku peuk mena'ai, kareno ade beuk temabuak tipung, ijai uku temurut tipung na, cobo beuk coa temabuak tipung pasti uku coa naai, ngen melat anok lenei"

Kacea; "amen awei o' kenok beuk"

Coa an kemudian beukpun moi mengadep

Kacea; "Beuk, benea nano ko tipung, sehinggo anok uso juget kemudian si mlat anok lenei sapei matei, cubo jemlas jano alasanu temabuak tipung.?"

Samo tegok, ngen kemawut butut, beuk o' jemawab; "benea da pak Hakim, nano sengajo uku tipung pingia biyoa, kareno uku kaget kemliak kelsip medek milot ne pakei bajau besai, awei lok perang ne, mako ne uku temabuak tipung perang ano da".

Tepening ba kacea, samo pekei do saleak ne coa si anok uso tapi kelsip, sidang o' kemudian di skor sampai men na.......

Puweng men na sidang pun muloi, kacea kemtuk palau samo mengelik si kemliak Kelsip samo betanye, "kelsip uleak nu medek ilot makei bajau besai o' awei tun lok perang ne sehinggo beuk temabuak tipung dan anok uso juget teplat anok lenei trus anok lenei o' matei sikapnu o' bahayo sehinggo ko ba do betangung jawab neak masalah yo...!!!"

Ati sudo kacea temanye, langsung notong Kelsip, "benea da pak Hakim, uku makei bajau besai siap untuk perang kareno uku kemliak udang medek milot ne mbin pedang takater, keis telosong bao, kujua senlindang. Sakoku perang bejijai bedao, sehinggo uku makei bajau besai, coa ku sako beuk o' temabuak tipung na"
Sidang skor 30 menit, kacea tambek binggung tapi si tep lok temgok keadilan, menurutne untuk sementaro udang saleak, akibat udang medek milot, kelsip makei bajau besai, beuk ketipung anok uso bejuget dan temlat anok lenei. Keputusan sudo skor ade ba menok udang , "Knok Udang uyo, keluak si megadep magea uku uyo..!!!!!!!!"

Coa an kemudian megadep ba Udang, " Udang benea ko medek milot mbin pedang ngen kujua,.?" tanye kacea

Langsung jenawab Udang, "benea da Kacea kareno uku kemliak kan sepet mdek milot ne matei mileak bae awei lok mbuk tun na, sehinggo uku siap-siap jibeak sapei si semrang keme"

Tambea bae pusing kacea, "Knok gacang kan sepet o'

Kacea; "kan sepet jawab ngen jujur, lebeak ko matai milea, gentai.!!!!!!! Samo teminjau mija, matai tebelik bae kacea "konamen akibat ne matai nu mileak, udang mbin pendang dan kujua, kelsip makei bajau besai, beuk tipung, anok uso bejuget tempat anok lenei, mmaaatteeeiiiiii......!!!"

Kemliak kacea bi mengiak, langsung sepet jemawab, " benea da kacea, matai ku mileak kareno ulau biyoa kenotok indok lenei.."

Baru ngertai kacea bahwa do saleak ne indok lenei, si kemotok ulau biyoa, saat bmaco keputusan ne indok lenei menyesal si bi kmotok ulau biyoa, akibat ne beruntun anok ne matei............ sidangpun tenotup

cerito yo kundi sebeiku waktau uku klas 5 SD, Erwin Tuntopos

Gambar, Tembo Tuntopos Tukang Susun; Erwin Tuntopos

Bismillahirrahmanirrahim
Neak lem tulisan siket yo,mimbar tun-jang cemubo mbahas masalah imen neak lem Islam.
ite samo-samo kenal neak lem Islam ade ne rukun Imen. imen yo dewek neak lem agamo islam ade tiket-tiket ne. Neak lem kiteb-kiteb turas ( klasik) dau ulama Islam jemlas meyakut masalah imen yo,kerno imen coa ite nam muker dio termasuk pokok lai neak lem agamo te agamo islam.
Adepun tiket imen neak lem Islam paro ulama' magiak tiket imen yo ijai telau tiket,cuma ade igai ulama temameak bahwa imen neak lem islam ade pat bagian.
Antaro ne ade ba :

1. Ade gen ne imen coa betameak coa bkuang,neak lem hal yo khusus mageak paro malaikat. Awei ipe ite namen bahwa imen paro malaikat,coa betamea coa bekuang..malaikat sengajo tuhan Allah cipta untuk senantiaso beribadat & berzikir magea Allah swt,coa makei payeak coa makei bedan bilai-bilai malaikat cuma untuk beribadat magea tuhan Allah swt. Malaikat ade mahluk sucai coa perneak durhako jano igai temtang periteak tuhan Allah bareak iblis.

2. Nomor duai ade gen ne imen selalu betameak coa perneak bekuang,dio ba imen paro nebai ngan rasul Allah swt. nebai ngan rasul Allah yo,imen ne selalu betameak coa perneak bekuang,bilai-bilai paro nebai seluyen semapei sariat untuk umat manusio ade ba beribadat magea Tuhan Alalh swt. Sangat saleak amen ade ungkapan tun madeak ade ne wali coa perlu igai ibadat magea tuhan atau paro ahli tarikat coa perlu igai beribadat magea Allah swt. sedangkan nebai ngan rasul dewek selalu beribadat magea Allah,neak lem sejarah ite samo-samo namen awei ipe ibadat paro nebai ngan rasul utusan Allah swt. nebai muhammad misal ne,trus ibadat magea tuhan Allah kebilai kelmen,bahkan sangat cet nebai Muhammad coa tidua muloi kunoi pelbeak sapei pueng hanyo untuk berzikir. Mako lem hal yo coa masuk akea amen ade tun mengakau si bi sapei tikat lekat lem beragamo islam sehinggo si cigai perlu igai ibadat magea tuhan Allah swt. dio ba tiket imen ke duai,imen ne paro nebai ngan rasul utusan Allah swt.

3. Yang ke telau tiket imen ade ba imen tun islam tetiko betameak tetiko bekuang. Nah,dio ba imen tun islam secaro kesuluruhan. Tetiko imen ne betamea teiko bekuang,ite pek bae misal ne ade tun islam dapat ujian kunoi tuhan Allah swt. misal ne neak lem hal kematei pacok bae neak lem keadaan musibah bareak yo imen ne bekuang. Namun ade kulo imen tun islam ketiko ade musibah ,imen ne tameak kuet kerno si yakin neak waktau musibah bareak o si dapet ujaian kunoi Allah.amen si tep kuet imen ne,mako neak kak belek musibah o ade berkat kunoi Allah swt. Awei o kulo imen tun islam ketiko dapet nikmat kunoi Allah swt. ade de betameak imen ne ade kulo de bkuang imen ne.

4. Kemudian tiket imen terakher ade ba imen de paling temeak,ade ba imen tun de selalu bekuang. dio ba imen tun fasik,tun de coa pecayo nien ade ne sariat kunoi than Allah swt. Jano igai kemrejo ibadat de sudo ade periteak kunoi Allah,masai ade ne tuhan bae si ragau,cuma neak lem identitas ne si mengakau si beragamo islam.
Luyen hal magea tun kafia,tun kafia coa de gen istilah imen magea si. Kerno tun kafia jelas-jelas syirik & coa masai ade ne sariat neak lem agamo islam bahkan si coa tun islam tapi kafia. jelas-jelas uak kunoi dalen de neridoi tuhan Allah swt

Mako neak lem hal yo,tike-tiket imen neak lem islam,ite namen bahwa imen tun islam ade tiko ne tuun ade kulo tiko ne betameak harapan te, imen te an waktau ne betameak didik waktau ne bekuang. mako ngan kemrejo periteak kunoi tuhan Allah sepenuak atei,ite dapet temiket imen te magea tuhan Allah swt. kerno coa ite dapet muker bahwa sariat islam yo de dapet majok ite moi keselamatan idup neak denio ngan idup neak akhirat. semugo...

Tulisannyo nea: Anton Tuntopos

Serambeak Be-pun adeba tutur tun jang untuk jemlas tentang struktur asal muasal tunjang neak Lebong, serambeak bepun nyo saei ne abiak awei yo; Topos, Teluk Diyen, Amen, Semelako, Plabai, Das Tebing. Kato-kato neak Serambeak Bepun o ade ba gen-gen sadei atau Kutai Tuwai neak Lebong, ade masalah neak kutai/sadei tuwai saat nyo masing-masing lok Tuwai tentune ngen argumen masing-masing.

Amen menurut keme Tun Topos, coa penting api tuwai yang penting gen akuak saat nyo Tun Jang pacok eksis sebagai penduduk asli neak Kulau yo. Tapi keme cubo semingung didik bahwa sadei-sadei neak serambeak bepun o' kute ne tuwai tapi sapei bilai yo sedei do gimasik neak penan asli cuma Topos, sementaro sadei do luyen gen ne bae do tuwai namun pnan kedudukan ne do asli coa si pnan sedei nyo uyo.

Amen neak lem sejarah Jang, Sadei Topos pun gi uai umorne karena neak Topos pun ade do sadei lebih Tuwai misalne, Suko Negerai, Kutai Mawua, Kutai Titik dan do luyen ne, tapi semenjak Bikau (sejarah bikau) Topos ba Sadei do Pertamo nea Bikau selanjutne kedau priode Depati atau Sireak pun kedudukan ne neak Sadei Topos. Neak Topos pun ade kepercayaan dan cerito bahwa Amen (Daerah Pak Lot dan Daet) amen neak lem sejarah Adat cuma megong Petai ne bae sementaro kucai Petai o' negong Tun Topos, secaro pilosofis tai ne ade bah bahwa masing-masing Kutai yo samo neak lem sejarah adat Jang terutamo neak Kutai Belek Tebo, masing-masing coa nam depisah namun neak lem kesatuan Adat Tiang Pat.

Serambeak bepun o', menurut tun tuwai ade ba patokan ketiko adat yo agok kabur, mako amen lok mesoa do asli ne si ade neak sadei do ade neak serambeak bepun o', biaso ne tip-tip sadei tuwai o ede cerito masing-masing dan biaso ne coa dau terlalu berbeda dibanding sadei-sadei do luyen, tapi harus ite pahami kulo bahwa masing-masing tun ade kepentingan terhadap sejarah asal usul, mako ketiko ite mesoa sejarah sejati adat harus lebiak atei-atei sehinggo hasil penusuran coa mbin perdebatan neak maso mendatang.

Tukang Tulis dio; Erwin Tuntopos