TUN TOPOS - SUKO NEGERAI

Neak Sadei Topos tamu Kutai bisao ne tenimo neak Gais Pigai, Gais Pigai yo ade pnan gerbang atau lawang masuk Kutai, Tamu do teko senambut secaro adat lengkap ngen peralatan awei iben, Bungai ngen biaso ne kulo pakei patun. Menurut Wok Salim neak batas yo ba masyarakat kutai temanye gen keperluan tamu yo teko moi sadei. Amen niat tamu yo kidek moi sadei neak pio ba tun semodona, mako ne tip-tip nyambut tamu harus ade ulubalang (tun sadei do ade lemau bela diri) sehinggo tamu do niat kidek jibeak sapei masuk moi sadei.

Amen tamu ne baik mao si nembut ngen adat, dau pepatah do senapei ngen tun tuai sadei terutamo akuak ro kondisi sadei misalne 'sadei keme halaman serut, podok atep buluak....' setelah proses petah-petitih yo tamu o neluak mbuk iben do nembin bujang gadis setelah o kenalung bungai, tamu biaso ne mbin kulo juru pantun ne sehinggo pacok jemawab kecek tua sadei.

Dio pertando ite tun jang mengormati tamu do berniat baik moi sadei ite, jelas wok salim, setelah sudo temimo tamu o' tamu kemudian nebin moi pan ne menujau neak di ba kulo tamu yo jenamu ngen areak pemuk, pemuk pembuka ne ade ba sawo njyoa uai ngen sawo tendok pelambang bahwa selamo neak sadei o si akan meraso tenang, supayo aus kaeun awei tekmok bio neak imbo, baru sudo o' tamu nyo nelei ba areak pemuk pangen ubet nyemen.

Mbin Cupik moi munen, ade ba ca'o tun Jang amen ade tun pei laher, biaso ne mbin cupik moi munen yo pertando umat manusia pertamo kemnal alam biaso ne kulo omor cupik yo 40 bilai, sehinggo titik yo atau cupik yo oleh tun tuwai ne nembin moi munen, tukang kembin ne ade ba dukun biaso ne tun tuwai atau sebei, neak di ba ade baco-baco ngen japai supayo cupik bi lai coa keno bahayo, penyakit ngen si terlindungi neak lem idupne, cupik biso ne menai neak pacua do biyoa ne ngalua, ade obor, taneak, ngen keis sako.

Nilai do terkandung ade ba supayo cupik amen bi lai be menjago alam (taneak, biyoa ngen opi) keis melambangkan senjato amen si bi lai, sudo menai biaso ne kulo ade kegiatan marhaban atau ucapak selamat datang ba tapi persi agamo ne, neak Topos lem sejarahne coa ade gen titik do ngindoi pas prosesi marhaban yo. Do kulo titik do pakei moi munen biso ne ja'ang do keno penyakit titik.

Sudo marhaban yo mako dau tun tuwai sadei menduo ngen mebaco japai atau ucep untuk si cupik, japai-japai biasone adeba japaijapai supayo cupik uak kundei penyakit, titik awei kudis, step, demem ade kulo tun tuwai sadei mbaco samo temuun lemau ngen titik amen menurut tun tuwai dau bahwa cupik yo neak kedong biali akan ijai tun hebat..... bersambung

Erwin Basrin
tun Topos (http://wintopos.wordpress.com)

Lemea neak sukua Jang ade ba pemuk utamo ngen cirikhas tun Jang, biaso ne tip kutai ade beda didik ca'o menea ne, amen neak Lebong lemea biaso ne coa tun cemapua ngen me'i, tapi neak Payang terutamo neak Manai Lok lemea biasone pakei me'i undokne, menurut sebeiku do biaso menea lemea neak Lebong, adepun ca'o menea lemea adeba;

1. Ite alau mesoa buluak moi bukau, alau mesoa lebung, jenis buluak ne do padek ne buluak ce'ik atau buluak kapea
2. Amen bi dapet lebung mako lebung o' nano nebersih kaleak ne cibeak coa tinget mepuk na, sudo o' lebung senisit, asea senisit o' nano trus cencong, mbeak sapei ajua, Lebung do sudo cencong yo nepuk igai babersihne untuk mepas miang atau mbon ne.
3. Lebong do sudo cencong, cenapua ngen kan, do padek ne kan biyoa tawen atau kan biyoa tawar luyen ne, amen bel'o ade kulo cenapua ngen tlelan uso (uyo uso agok ja'ang do kulo nelarang pemeriteak, ijai jaang do menea lemea tlan uso)
4. Campuran lebung ngen kan yo, ne'em abiak demingau supayo si jijai kileak
5. Sudo o' lemeak baru buliak kemsok, capua ngen cabe, atau repeak masakan sesuai ngen selero ite, do padekne capua kan mas atau kan semeak genureng atau ce'ak
   
6. Selamat menikmati, biaso ne amen muk lemea cigai tinget awok igai.....
   

By Erwin Tuntopos

Aceh ngen Topos temuan cerito leluhur do erat neak maso lalu, ade cerito persahabatan ngen ade kulo cerito perang, uyo tentu ne berubeak ketiko jaman bi maju, Bunaya, jolok ne ade ba Bun, si tun aceh asli, tapi uyo kembiak dau kontribusi dan ptulung untuk kemajuan tun Topos.

Tengeak idup ne uyo diapdikan untuk milau kakuat tun topos untuk meket igai ca'o adat, sebenea ne cerito perjalanan ne sapai terlibat dau neak Topos ade ba bermuaro kundei si meratau kundei aceh sapei kulau, trus du begaul ngen tun kulau kemudian temau ngen Erwin salah satu tun topos nah, ketiko temau win yo ba si dau tertarik ngen Topos, uyo si bi resmi ijai tun topos, kereno pertamo si bi naket keluargo lai Win sebagai anok aket ngen kemudia si kulo bi nikeak ngen tun topos uyo si bi ade anok na.

Bolg yo kulo sebenea ne murupakan bentuk dukungan dan kontribusi Bun terhadap tun topos, sementaro kembiak dau do luyen ne kontribusi terhadap kampanye adat topos, menea film tentang ka ga nga, film mulang apei, dll. Semoga neak uan bilai dau Bun-Bun do luyen ne lok temulung ngen ba bagiak lemau untuk kemajuan tun topos.

Gen ku Erwin, uku laher neak sadei Topos, waktau uku laher Topos ati gen listrik, untuk penerangan keme makei lapu minyok tanah (lapu Togok), Indok ku tun Topos Ali amen nerunut kundei silsilah kak indok ku mako sapai Bikau dan Ajai, sementaro Tiak Ku Amen nerunut menurut silsilah mako sapai Rajo Tiak Keteko neak Sekandeu Tabeak Daet, dio dibuktikan kundei cao keme neak Topos melalui Cemucua Biyoa, amen Kak indok ku karena keluargo ne sebagai pemegong ju'ei keluargo si coa pakei cemucua biyoa tetapi tun do dau moi cemucua biyoa moi umea keme, sementari kak tiak ku cemucua biyoa ne moi Sekandeu, neak di leluhur ku ade awei o pesen tiak ku.

Uku sekolah SD ngen SMP neak Topos kebetulan cuma SD dan SMP salah satu bangunan pemeriteak do ade neak pio, setelah tamat SMP uku sekula SMA neak Cu'up, waktau sekulah uku diyem umeak wok ku, kebetulan si ade umeak neak Cu'up, ade pengalaman menarik ketiko neak Cu'up selamo neak Topos keme selalu menguno bahaso jang neak pergaulan babilai, waktau gi babelau uku cet tekembin baso jang amen begaul ngen kuwat ku.

Setelah Tamay SMA uku neluak Tiak ku menutut sekulah neak Padang, neak padang uku cubo mbok Fakultas Teknik Sipil neak salah satu perguruan Tinggi Neak Padang, secaro akademisi uku cio dau prestasi, pada hal uku ade ba harapan tun tuwai ku, waktau uku mulio kuliah, Indonesia mengalami krisis, mako tun tuwai ku kulo agok payeak memenuhi kebutuhan kuliah ku, sehinggo beberapo matai kuliah praktek terpakso uku temingea, nah... waktau o kulo kampus-kampus sibuk ngen agenda reformasi, uku milau aktif neak aktivitas yo, waktau uku kuliah kembiak dau musibah neak keluargoku, Tiak Ku tingang kiyeu waktau upeak tembas kebun tun untuk mbayar uang kuliah ku, wok pnan uku tingea waktau SMA ningea, do kembiak lai ne Sebei (indok Tiak ku) ningea, waktau o tiak ku an semido si sakit sehinggo biaya kuliah ku, biaya kuliah asuak ku terpakso bedan, coa ade gen keluargo ku do lok temulung keme kuliah sehinggo kuliah ku ngen asuak ku terpakso bedan.

Menarik ne ketiko uku kuliah, uku belek moi sadei untuk kindoi caci untuk bayar uang kuliah, keliling uku ngen indok ku mesoa pnan kinyem, tapi coa ade tun do lok melei keme kinyem, sehinggo uku coa nam brakat moi Padang nah, waktau o ba sebei ku meningea, an uku neak sadei akhir ne Susi (uyo si ijai ngenyanku..) demapet uku untuk mbayar uang kuliah ku si jemua kalung pemberian indok ne, nukoi kalung o ba semelamat untuk sementaro agenda kuliah ku.

Akhir ne uku coa tamat kuliah pada hal didik igai, cuma menea kripsi igai, uku belek mesaidei cubo menea lembaga, keme ngen kakuat cubo menea AMARTA waktau o' uku ijai supirne, trus uku cubo bergaul ngen kwat-kwat aktivis neak kulau sehinggo mengantar kan ku mimpin AMA Bengkulu organisasi pergerakan masyarakat neak kulau, uyo uku kerjo neak lembaga gen ne Akar, lembago yo hasil kerjo ngen jerih payeak ku dewek tampa bantuan kundei tun dau o'.

Tekat ku cuma do, supayo berguno bagi keluargo ku, ngen masyarakat ku,,,, sudo kileak ehh, coa uku taen biyoa matai ku ngalua amen minget kesaro idupku..... 

Erwin Basrin

(Tun Topos Cubo Menea Perubahan)