TUN TOPOS - SUKO NEGERAI

Rusli amen neak sadei jenolok tun li, si o ade ba tun Topos do meraso idup neak denio yo coa adea magea si, tapi si berusaho coa perneak ngeluh, coa menyereak ngen tep melawen kesaro idup. Untuk midup anok ngenyan tenameak igai si buto urup, coa nam bebaso, agok iloa cuma si temuan kejujuran ngen ketulusan lem maneu idup.

Amen pelbeak bilai si keliling sadei Topos jemua lebung, jemua putung tetiko si kulo coa temukar barang ne ngen caci tapi si temukar ngen belas atau jano do semelang jijai kebutuhan ne bilai o' misal ne gulo atau minyok mis. Kadang-kadang sesamo keliling si kulo temanye ngen tun nak sadei api nam majok si kerjo. amen belek moi sadei mamak li tun ne coa perneak makei selop jano igai makei sepatu.

Biaso ne amen si Mbin barang hasil ne mecarai umpamo Lebung, Putung, Gen Lapen mako si keliling sadei lok jemuwoa barang ne da, tapi biaso ne si coa tau jano si jemuwoa atao temukar barang ne ngen masyarakat, tapi biasone jano kebutuhan do perlu ne mako barang do si mbin o' tenukar ngen kebutuhan ne, misalne amen si lok megesok perlu belas mako barang do si mbin si coa lok nelei ngen caci si lok barang ne tenukar ngen kebutuhanne, umpamo ne belas.

Meskipun idup ne masuk katagori saro, si coa penah kinoi tulung, tapi si berusaho untuk keluwea kundei masalah ne, Mamak li yo tingea nak Kutai Kauk ipit kubua, Umeak ne sederhana, idup ngen ngenyan na ngen anok-anok ne, sampei bilai yo coa ade informasi si maling, atau sebalikne tun Topos temulung kebutuhan ne, padahal dau kulo tuntopos do agok senang idupne.

Kundei Mamak Li yo ba keme do auai yo belajea kemenal idup, bahwa idup yo coa si perlu nyereak, berusaho terus, toh tuhan pasti melei dalen keluwea ne, sebenea ne Mamak Li yo ba sebagai infiratif anok uai Topos untuk muloi bangkit kundei stigma sebagai Tun Ulau Ketahun.

Tukang Tulis dio; Sugian dan Erwin Tuntopos